28 сакавіка ў Беларускі дзяржаўны музей народнай архітэктуры і побыту адбудзецца святкаванне «Саракі» — аднаго з традыцыйных вясновых абрадаў, які захаваўся ў беларускай культуры. Пра гэта паведамілі ў музеі.
З даўніх часоў гэты дзень звязвалі з надыходам вясны: людзі верылі, што менавіта ў гэты перыяд вяртаюцца птушкі, а прырода канчаткова прачынаецца пасля зімы. Свята ўспрымалася як сімвал абнаўлення, надзеі і пачатку новага жыццёвага цыклу.
Арганізатары падрыхтавалі інтэрактыўную праграму з пагружэннем у народныя традыцыі. Наведвальнікі змогуць развучыць вясновыя песні разам са спецыялістамі і паспрабаваць сябе ў сумесным спеве, як гэта рабілі ў вёсках. Таксама гасцей пазнаёмяць з народнымі танцамі — «Лявоніхай» і «Крыжачком», а праз гульні пакажуць асаблівасці традыцыйнага адпачынку.
Асобнай часткай стане майстар-клас па вырабе дэкаратыўных птушак з каляровай паперы — сімвала вясны і цяпла. Удзельнікі змогуць забраць выраб з сабой як невялікі абярэг.
Мерапрыемства пройдзе ў аграгарадку Азярцо з 14:00 да 15:00, пры гэтым сам музей працуе з 10:00 да 17:00, а каса — да 16:30. Кошт уваходу для дарослых складае 18 рублёў, для студэнтаў і навучэнцаў — 9 рублёў, дзеці дашкольнага ўзросту могуць наведаць музей бясплатна. Аплаціць білеты можна як наяўнымі, так і банкаўскай картай, аднак для пакупкі сувеніраў у рамеснікаў лепш мець пры сабе наяўныя грошы — банкаматаў на тэрыторыі няма.
Арганізатары раяць апранацца ў адпаведнасці з надвор’ем, бо частка праграмы будзе праходзіць на адкрытым паветры, і папярэджваюць, што пры неспрыяльных умовах асобныя элементы свята могуць быць зменены.
Дабрацца да музея можна ад аўтавакзала «Юга-Заходняя» прыгараднымі аўтобусамі ў напрамках Мінск — Дубенцы, Мінск — Заходнія могілкі (170с), Мінск — Паварот да музея (150), Мінск — Чыкі, а таксама маршрутнымі таксі №1277, №1111, №1026. На аўтамабілі варта арыентавацца на раён за аўтарынкам «Малінаўка», прыкладна ў 4 кіламетрах ад МКАД.
