У Гродзенскай вобласці валанцёры адраджаюць старажытны Любчанскі замак

История

Любчанскі замак, неаднаразова разбураны войнамі і пажарамі, паступова вяртае сабе былы велічны выгляд. Замак сустракае гасцей трыма вежамі з купаламі і абарончай сцяной, а акружаны комплексам рвоў выглядае гэтак жа, як і чатыры стагоддзі таму.

Крэпасць 20 гадоў адраджае ураджэнец Любчы Іван Печынскі, для якога гэта стала справай усяго жыцця. Праз яго дабрачынны фонд «Любчанскі замак» прайшло каля 3200 валанцёраў. Агульнымі намаганнямі былая рэзідэнцыя знакамітых родаў Вялікага княства Літоўскага падымаецца з руін.

Час не пашкадаваў цытадэль 16-га стагоддзя: да «нулявых» ад яе засталіся дзве абветшалыя вежы і земляныя ўмацаванні з фрагментамі абарончай сцяны. Былы палац апынуўся ў заняпадзе. Усё гэта з цяжкасцю нагадвала замак.

Першыя сем год аднаўленчыя работы фінансаваў з асабіста Іван Печынскі, паведамляе minsk-region.by. А апошнія 15 гадоў фінансавую падтрымку рэстаўрацыі аказвае Прыорбанк, які сёння з’яўляецца асноўным мецэнатам праекта.

Большая частка замка ўжо адноўлена. З апошняга – нанова пабудавана паўночная (Дазорная) вежа. На яе ўсталявалі 6-тонны купал. З узвышша адкрываецца раскошны выгляд на Нёман. У небе час ад часу праносіцца бусел – яго гняздо узвышаецца на слупе каля ўваходу ў замак.

Між вежамі працягнуліся абарончыя сцены. Каля паловы цаглін валанцёры знайшлі пры разборцы старых будынкаў. З трох бакоў крэпасць акружае абарончы роў, які амаль не мяняўся стагоддзямі.

Наперадзе яшчэ шмат працы – засталося адрадзіць усходнюю вежу. А разам з ёй адбудаваць і агароджы: фундамент пад іх ужо заліты. У планах жа – ператварыць крэпасць у турыстычную славутасць. У будучыні яна магла б стаць канкурэнтам свайму суседу – Мірскаму замку.

Оцените статью
Витебский Курьер
Добавить комментарий